दक्षिणी अफ्रिकी डी भीलियर्सको प्रस्ताव ढिला आएको कप्तान प्लेसिसको प्रतिक्रिया

दक्षिण अफ्रिकाका कप्तान फाफ डु प्लेसिसले सन्यास फिर्ता लिँदै विश्वकप खेल्ने एबी डी भीलियर्सको प्रस्ताव निकै ढिला आएको बताएका छन् ।

विश्वकप अन्तर्गत वेष्ट इण्डिजविरुद्धको वर्षाले प्रभावित खेलपछि बोल्दै कप्तान प्लेसिसले पूर्व कप्तानले प्रस्ताव गरेको भएपनि त्यो निकै ढिला भएको बताए ।

विश्वकपमा दक्षिण अफ्रिकाले लगातार खराब प्रदर्शन गरेपछि पूर्व कप्तान डी भीलियर्सले विश्वकप अघि सन्यास फिर्ता लिंदै टिममा फर्कने प्रस्ताव गरेको खबर बाहिरिएको थियो । डी भीलियर्सले गत बर्ष अन्तराष्ट्रिय क्रिकेटबाट सन्यास घोषणा गरेका थिए । तर, डी भीलियर्सले इंग्ल्याण्डमा जारी १२ औं संस्करणको विश्वकप खेल्ने ईच्छा व्यक्त गरेका थिए ।

सन् २०१८ को मेबाट डी भीलियर्सले अन्तराष्ट्रिय क्रिकेटबाट सन्यास घोषणा गरेका थिए । उनले दक्षिण अफ्रीकाबाट २ सय २८ एक दिवसीय खेलमा ५३ दशमलब ५० को औशतमा ९ हजार ५ सय ७७ रन बनाएका छन् । यस्तै, उनले एक दिवसीयमा सबैभन्दा छिटो शतक प्रहार गर्ने खेलाडीको रेकर्डसमेत बनाएका छन् ।