यु–२० विश्वकपमा कोरियाको ऐतिहासिक खुशी

पोल्याण्डमा जारी फिफा यु–२० विश्वकपको फाइनलमा प्रवेश गरेपछि लुब्लिनस्थित लुब्लिन स्टेडियममा एसियाली राष्ट्र दक्षिण कोरियाका खेलाडीहरुले खुशीको सेलिब्रेट गरे ।

सेमिफाइनलमा दक्षिण कोरियाले इक्वेडरलाई १–० ले हराउँदै फाइनल स्थान पक्का गरेको थियो ।

कोरियाका लागि पहिलो हाफको ३९ औं मिनटमा चोइ जुनले एक मात्र निर्णायक गोल गरे । स्मरणीय छ, दक्षिण कोरियाले यहि मैदानमा दावेदार मानिएको आफ्नो छिमेकी प्रतिद्वन्द्वी जापानलाई नकआउट चरणमा हराएको थियो ।

दक्षिण कोरियाले अब फाइनलमा युक्रेनको सामना गर्दैछ । युक्रेनले भएको पहिलो सेमिफाइनलमा इटालीलाई १–० ले हराउँदै फाइनल स्थान सुरक्षित गरेको थियो । युक्रेनको पनि यो पहिलो फाइनल हो । फाइनल खेल शनिबार लोज स्टेडियममा दक्षिण कोरिया र युक्रेनबीच हुनेछ ।