महिला टी–२० विश्वकपको एशिया छनोट: नेपालले बहराइनलाई हरायो

महिला टी–२० विश्वकपको एशिया छनोट खेलमा नेपालले बहराइनलाई हराएको छ।

आइसीसी महिला टी–२० विश्वकप सन् २०२६ को एशिया छनोटमा नेपालले शनिबार भएको खेलमा बहराइनलाई ९ विकेटले हरायो।

टस हारेर पहिला ब्याटिङ गरेको बहराइनले नेपाललाई जीतका लागि ४२ रनको लक्ष्य दिएको थियो।

जवाफमा नेपालले ४ ओभर २ बलमा १ विकेट गुमाएर भेट्टायो।

आजको खेलमा नेपालकी कविता कुँवरले ११ बलमा सर्वाधिक १८ रन बनाइन्।

सम्झना खड्काले १० बलमा अविजित १३ रन जोडिन्।

इन्दु बर्माले ५ बलमा ७ रन थपिन्।

बहराइनले निर्धारित ५ ओभरमा १ विकेट गुमाएर ४१ रन बनाएको थियो।

खेल ढिलो सुरू भएका कारण ५ ओभरमा झारिएको थियो।

यसअघि, हिँजो (शुक्रबार) को खेलमा मैदान ओसिलो भएका कारण खेल हुन नसकेपछि नेपाल र हङकङले १/१ अंक बाँड्यो।

नेपालले २ खेलबाट ३ अंक जोडेको छ।

एशिया छनोटमा नेपालसँगै आयोजक थाइल्याण्ड, भुटान, कुवेत, कतार, मलेसिया, हङकङ, बहराइन र युएईको सहभागिता छ।

नेपाल रहेको समूह ‘सी’ मा बहराइन र हङकङ छन्।

नेपालले अब मंगलवार फेरि हङकङसँग र बुधवार बहराइनसँग खेल्ने तालिका छ।

हरेक समूहका टोलीले एकआपसमा २ पटक खेलेपछि समूहको शीर्ष टोलीले ‘सुपर–थ्री’ मा स्थान बनाउनेछ।

‘सुपर–३’ बाट शीर्ष २ टोली ग्लोबल छनोट चरणमा पुग्नेछन्।