स्याङ्जाको गल्याङमा १८१ विद्यार्थीलाई १२ लाख छात्रवृत्ति

स्याङ्जाको गल्याङ नगरपालिकाले विपन्न परिवारका १८१ जना छात्रछात्रालाई छात्रवृत्ति प्रदान गरेको छ।

आर्थिक अभावका कारण उच्च शिक्षा अध्ययनबाट वञ्चित हुन नपरोस् भन्ने उद्देश्यले नगरपालिकाले १२ लाख १७ हजार ८ सय रुपैयाँ छात्रवृत्तिस्वरुप उपलब्ध गराएको नगर प्रमुख गुरुप्रसाद भट्टराईले जानकारी दिएका छन्।

नगरपालिकाका गल्याङ बहुमुखी क्याम्पस र मालुंगा बहुमुखी क्याम्पसमा अध्ययनरत् जेहेनदार, विपन्न तथा गरिब छात्रछात्रालाई मासिक शुल्कवापत एक वर्षको एकमुष्ट जनही १० हजार ८ सय रुपैया प्रदान गरिएको प्रमुख भट्टराईको भनाई छ।

यसैगरी, कक्षा ११ र १२ मा अध्ययनरत् अतिगरिब, विपन्न तथा जेहेनदार विद्यार्थीलाई जनही साढे ३ हजार रुपैयाँ उपलब्ध गराइएको छ।

यस वर्ष क्याम्पसमा अध्ययनरत् ८० जनालाई नि:शुल्क, अति विपन्न २ जना र कक्षा ११ र १२ मा अध्ययनरत् ९९ जनालाई छात्रवृत्ति प्रदान गरेको उपप्रमुख हेमा न्यौपानेले बताइन्।

अतिविपन्न, गरिब तथा जेहेनदार विद्यार्थीका लागि सम्बन्धित क्याम्पस तथा विद्यालयले छात्रवृत्तिका लागि आवेदन माग गर्ने र प्राप्त आवेदनलाई पालिकाको कार्यविधि बमोजिम सिफारिस गर्ने गर्दछ।

कार्यविधिमा पूर्णछात्रवृत्ति प्राप्त गरेको विद्यार्थी उत्तीर्ण भएमात्रै अघिल्लो कक्षामा अध्ययन गर्न पुन: छात्रवृत्ति पाउनेछन्।

र, अनुत्तीर्ण पुन:उक्त सुविधा पाउने/नपाउने उल्लेख छ।

शैक्षिक क्षेत्रको गुणस्तरीतामा वृद्धि हुनुका साथै शिक्षाको सहज पहुँचबाट कोही पनि वञ्चित हुन नदिने नगरपालिकाको अभियान रहेको प्रमुख भट्टराईको भनाई छ।