त्रिदेशीय टी–२० अन्तराष्ट्रिय क्रिकेट: नेपाल पहिलो खेलमै नेदरल्यान्ड्ससँग पराजित

स्कटल्यान्डमा चलिरहेको त्रिदेशीय टी–२० क्रिकेट श्रृंखलाको आफ्नो पहिलो खेलमा नेपाल नेदरल्यान्ड्ससँग तेस्रो सुपर ओभरमा पराजित भएको छ।

नेदरल्यान्ड्सले जीतका लागि दिएको १५३ रनको लक्ष्य पछ्याएको नेपालले निर्धारित २० ओभरमा ८ विकेट गुमाएर १५२ रन नै बनाएपछि खेल सुपर ओभरमा पुगेको थियो।

निक्कै प्रतिस्पर्धात्मक खेलमा पहिलो सुपर ओभरमा नेपालले १९ रन बनायो।

जवाफमा नेदरल्यान्ड्सले पनि १९ रन जोड्यो।

फेरि खेल दोस्रो सुपर ओभरमा पुग्यो।

दोस्रो सुपर ओभरमा नेदरल्यान्ड्सले १७ रन जोड्दा नेपालले जवाफमा १७ रन नै बनाएपछि खेल तेस्रो सुपरमा पुगेर छिनोफानो भयो।

तेस्रो सुपर ओभरमा नेपालले ४ बलमा कुनै रन नजोडी २ विकेट गुमायो।

जवाफमा नेदरल्यान्ड्सका माइकल लेभिटले सन्दीप लामिछानेको पहिलो बलमा नै छक्का प्रहार गरेर टोलीलाई जिताए।

त्यसअघि, पहिला ब्याटिङ गरेको नेदरल्यान्ड्सले निर्धारित २० ओभरमा ७ विकेट गुमाएर १५२ रन बनाएको थियो।

श्रृंखलाअन्तर्गत आइतवार भएको पहिलो खेलमा स्कटल्यान्डले नेदरल्यान्ड्सलाई ३९ रनले हराएको थियो।

नेपालले आफ्नो दोस्रो खेलमा आज (मंगलबार) घरेलु टोली स्कटल्यान्डसँग खेल्दैछ।