खेल पत्रकारलाई खेलकुदसम्बन्धी तालिम

नेपाल खेलकुद पत्रकार मञ्च गण्डकी आयोजनामा पोखरामा शुक्रबार खेल पत्रकारलाई क्षमता अभिवृद्धि तालिम दिइएको छ।

संचार तथा सूचना प्रविधि मन्त्रालयको आर्थिक सहयोगमा भएको तालिममा भलिबल, एथ्लेटिक्स र क्रिकेट खेलबारे प्रशिक्षण दिइएको हो।

तालिममा खेलका नियम बुझाउँदै पत्रकारले समाचार लेख्दा बुझ्नुपर्ने विषयका बारेमा समेत प्रशिक्षित गराइएको हो।

भलिबलसम्बन्धी राजन पौडेल, आइटीओ एथ्लेटिक्ससम्बन्धी सिद्धान्त अधिकारी र क्रिकेटसम्बन्धी रिजन प्रजुले प्रशिक्षण दिए।

प्रदेश खेलकुद परिषद् गण्डकीका उपाध्यक्ष धोजकुमार गुरुङले तालिम उद्घाटन गर्दै खेल क्षेत्रका विभिन्न समस्या समाधानमा सरकारसमक्ष पुर्‍याउन पत्रकारले खेल क्षेत्र र यसका नीति नियम बुझ्न आवश्यक रहेको औंल्याए।

साथै खेल र खेलाडीबारे प्रकाशित सकारात्मक समाचारले खेल संघ तथा खेलाडीलाई प्रोत्साहन मिलेको समेत गुरुङको भनाइ थियो।

मञ्च अध्यक्ष एमबी आस्थामगरले तालिमको उद्देश्यबारे जानकारी दिँदै यसको आवश्यकता र महत्व विषयमा प्रकाश पारे।

कार्यक्रममा प्रेस काउन्सिल नेपाल सदस्य केशवशरण लामिछाने, नेपाल पत्रकार महासंघ कास्की अध्यक्ष माधव बराललगायतले शुभकामना मन्तव्य राखेका थिए।

मञ्चका उपाध्यक्ष राजाराम पौडेलले स्वागत र महासचिव परशुराम शर्माले कार्यक्रम संचालन गरेका थिए।