यु–२० साफ महिला च्याम्पियनसीप: नेपालले भुटानलाई ८ गोलले हरायो

२० वर्षमुनिको साफ महिला च्याम्पियनसीपमा नेपालले भूटानलाई ८ गोलले हराएको छ।

बंगलादेशको बसुन्धरा स्पोट्र्स मैदानमा शनिबार भएको खेलमा नेपालले भुटानलाई ८ गोलको फराकिलो अन्तरले हराएको हो।

नेपालका लागि पूर्णिमा राईले ह्याट्रिकसहित ४ गोल गरिन्।

मिना देउवाले ह्याट्रिक गरिन्।

कुसुम खतिवडाले १ गोल गरिन्।

यसअघि, पहिलो खेलमा नेपालले भुटानलाई ६–१ गोलले हराएको थियो।

प्रतियोगितामा घरेलु टोली बंगलादेशसहित नेपाल, भुटान र श्रीलंका सहभागी छन्।

डबल राउन्ड रोबिनका आधारमा खेल खेलाइएको हो।

सबै खेल सकिएपछि शीर्ष टोली च्याम्पियन बन्नेछ।

यसअघि, नेपालले श्रीलंकासँगका २ खेलमा पनि फरक गोलअन्तरमा जीत निकालेको थियो।

नेपालले श्रीलंकालाई पहिलो र दोस्रो खेलमा समान ७ गोलले हराएको थियो।

आफ्नो दोस्रो खेलमा नेपाल बंगलादेशसँग ३–२ गोलले पराजित भएको थियो।

बंगलादेशले ४ खेलमा जीत निकालेको छ।

१ खेल कम खेलेको बंगलादेश १२ अंकका साथ दोश्रो स्थानमा छ।

५ खेलमा ४ जीत र १ खेल हारेको नेपाल १२ अंकसहित शीर्ष स्थानमा उक्लिएको छ।

आजै बेलुका बंगलादेश र श्रीलंका खेल्दैछन्।

नेपालले पर्सि सोमवार बंगलादेशसँग अन्तिम खेल खेल्नेछ।