महिला टी–२० विश्वकप ग्लोबल छनोटमा नेपालको खराब सुरुआत

आइसीसी महिला टी–२० विश्वकप ग्लोबल छनोटमा नेपालले खराब सुरुआत गरेको छ।

आफ्नो पहिलो खेलमा नेपाल थाइल्यान्डसँग ८ विकेटले पराजित भएको हो।

नेपालले दिएको १ सय २३ रनको लक्ष्य पछ्याएको थाइल्यान्डले १६ ओभर ५ बलमा २ विकेट गुमाएर भेट्टायो।

थाइल्यान्डकी नथ्थकन चान्थमले अविजित ५७ रन बनाइन्।

नेपालकी सीता रानामगरले २ विकेट लिइन्।

यसअघि, कीर्तिपुरको त्रिवि अन्तर्राष्ट्रिय क्रिकेट रंगशालामा टस हारेर ब्याटिङ गरेको नेपालले २० ओभरमा १ सय २२ रन बनाउँदा सबै विकेट गुमायो।

नेपालकी बिन्दु रावलले सर्वाधिक ४४ रन बनाइन्।

थाइल्यान्डकी थिपाच्चा पुथावाङले ३ विकेट लिइन्।

१० टोली सहभागी प्रतियोगिता माघ १८ गतेसम्म चल्नेछ।

प्रतियोगितामा दुवै समूहबाट शीर्ष ३ मा पर्ने टोलीहरू ‘सुपर–सिक्स’ मा पुग्नेछन्।

‘सुपर–सिक्स’ बाट शीर्ष ४ वटा टोली आउँदो वर्ष इंग्ल्यान्ड र वेल्समा हुने महिला टी–२० विश्वकपमा छनोट हुनेछन्।