एकदिवसीय श्रृंखलामा नेपालको ‘ए’ टोली ओमानसँग पराजित

ओमानसँगको एकदिवसीय श्रृंखलाको पहिलो खेल मा नेपालको ‘ए’ टोली ७० रनले पराजित भएको छ।

ओमानले दिएको २८१ रनको लक्ष्य पछ्याएको नेपाल ‘ए’ ले ४४ ओभर ४ बलमा २१० रन बनाउँदा सबै विकेट गुमायो।

नेपाल ‘ए’ का ईशान पाण्डेले सर्वाधिक ५२ रन बनाए।

कप्तान अनिलकुमार साहले ५० रन थपे।

ओमानका सकील अहमद र हसनैन अली शाहले समान ३/३ विकेट लिए।

यसअघि, काठमाण्डौको माथिल्लो मूलपानी क्रिकेट मैदानमा टस जितेर ब्याटिङ गरेको ओमानले ५० ओभरमा ९ विकेट गुमाएर २८० रन बनायो।

ओमानका मुजिबुर अलीले सर्वाधिक ७२ रन बनाए।

जितेन्दर सिंहले ५८ रन जोडे।

नेपालका आकाश चन्दले ४ विकेट लिए।

नेपालको ‘ए’ टोली र ओमानबीचको एकदिवसीय श्रृंखलाको दोस्रो तथा अन्तिम खेल पर्सि (शुक्रवार) हुनेछ।

यसपछि, नेपालको ‘ए’ टोलीले स्कटल्यान्ड र अमेरिकासँग पनि २/२ वटा एकदिवसीय खेल खेल्नेछ।

यसैबीच, आउँदो शनिवारदेखि कीर्तिपुरको त्रिवि मैदानमा नेपाल, संयुक्त अरब इमिरेट्स (युएई) र ओमानबीचको आइसीसी क्रिकेट विश्वकप लिग–२ श्रृंखला सुरू हुँदैछ।