ग्लोबल टी–२० क्रिकेटमा विनिपेगले टोरन्टोलाई हरायो

क्यानडामा जारी ग्लोबल टी २० क्रिकेट लिगमा विनिपेग हक्सले टोरन्टो नेशनल्सलाई तीन विकेटले पराजित गरेको छ ।

जारी लिगमा सोमपाल विनिपेग र सन्दीप टोरन्टोमा आबद्ध छन् । उनीहरु ति क्लबहरुको व्यवसायिक खेलाडीहरु हुन् ।

क्यानडामा भएको खेलमा टस हारेर ब्याटिङको निम्तो पाएको टोरन्टोले २० ओभरमा ७ विकेट गुमाउँदै २ सय १६ रन बनाएको थियो । भारतीय खेलाडी युवराज सिंहको कप्तानीमा रहेको टोरन्टोले सन्दीपलाई आइतबारको खेलमा बेञ्चमा राखेको थियो । यही खेलका लागि सन्दीप र सोमपाल सिंगापुरबाट टी–२० विश्वकपको एसिया छनोट सकिएको केही समयपछि नै क्यानडा उडेका थिए ।

टोरन्टोका लागि रोड्रिगो थोमसले ६५ रन बनाए । युवराज सिंहले ४५ तथा कायरन पोलार्डले विस्फोटक ५२ रन बनाए । पोलार्डले २१ बलमा ३ चौका र ५ छक्का प्रहार गरे । बलिङमा ड्वायन ब्राभोले ४ विकेट लिए ।

जवाफमा सोमपालको टिम विनिपेगले २० ओभरमा सात विकेट गुमाउँदै लक्ष्य पूरा गरेको थियो । उसका शीर्ष तीन खेलाडीले मात्र दोहोरो अंक बनाएर पनि जित निकाल्यो । उसका लागि क्रिस लियोनले विस्फोटक ८९ रन बनाए । जसमा उनले ४८ बलमा २ चौका र १० छक्का प्रहार गरे ।

यस्तै, सेइमन अनवरले ४३ तथा सन्नी सोहलले ५८ रन बनाए । उसको जितमा सन्नी सोहल र क्रिस लियोनबीचको शतकीय साझेदारी नै जितको आधार बन्यो । दोस्रो विकेटका लागि लियोन र सोहलबीच एक सय १७ रनको साझेदारी थियो ।

यस खेलमा सोमपाल पनि बेञ्चमै थिए । यस जितसँगै विनिपेगले ३ खेलमा ४ अंक बनाउँदै लिगको दोस्रो स्थानमा उक्लिएको छ ।