नेपाल चलचित्र क्षेत्रकी बरिष्ठ अभिनेत्री सुभद्राको निधन

पोखरा । वरिष्ठ अभिनेत्री सुभद्रा अधिकारीको ७३ वर्षको उमेरमा निधन भएको छ ।

अधिकारीको शनिबार बिहान डल्लुस्थित आफ्नै निवासमा निधन भएको हो । अधिकारीको शनिबार नै पशुपति आर्यघाटमा अन्त्येष्टी गरिने भएको छ ।

६ वर्षको उमेरदेखि नै अभिनय थालेकी अधिकारीले पहिलो पटक नेवारी नाटक कचिमचा (काँचो माटो) बाट अभिनय गर्न सुरु गरेकी थिइन् । अधिकारीले करिब चार दशकदेखि कलाकारितामा सक्रिय थिइन् । अधिकारीको पहिलो फिल्म ‘मनको बाँध’ हो ।

अधिकारीले सयौंको संख्यामा चलचित्रमा अभिनय गरेकी छिन् । अधिकारीले वसन्ती, मुनामदन, बेहुली, भाउजू, माया पिरती, मसान चिनो, कन्यादान, भाउजु लगायतका धेरै चलचित्र तथा टेलिफिल्महरुमा अभिनय गरेका छन् । त्यसमध्ये चिनो, कन्यादान, भाउजुलगायतका स्व अधिकारी अभिनित चर्चित चलचित्रहरु हुन् ।

स्व. अधिकारी फिल्म क्षेत्रमा मात्र नभएर रंगमञ्च र गायन क्षेत्रमा पनि आवद्ध थिइन् । उनलाई २०६३ सालमा दीर्घ साधना सम्मानबाट पनि सम्मानित गरिएको थियो ।

अधिकारी केही समयदेखि निमोनियाबाट ग्रसित थिइन् । स्व. अधिकारकिा एक छोरा र एक छोरी छन्। उनका श्रीमान् नाट्य कलाकार कृष्ण अधिकारीको यसअघि नै निधन भइसकेको छ ।