गोपिचन्द्र पार्कीले जिते चितवन रत्ननगर रोटरी म्याराथन

चितवन । विभागीय सशस्त्र प्रहरी बल, एपीएफका धावक गोपिचन्द्र पार्कीले चितवनमा भएको रत्ननगर रोटरी म्याराथन जितेका छन् ।

हालैमात्र घरेलु भुमीमा सम्पन्न १३ औ साग खेलका स्वर्णपदक विजेता गोपिचन्द्रले ३ सय ५१ जनालाई पछि पार्दै म्याराथन जितेका हुन् ।

निर्धारित साढे १४ किलोमिटरको दूरी ४२ मिनेट ३५ सेकेण्डमा पार गरी गोपिचन्द्रले म्याराथन जितेका हुन् । म्याराथन विजेता गोपिचन्द्रले ५० हजार नगद सहित चाँदीको मेडल र प्रमाणपत्र पुरस्कार पाए ।

रोटरीका डिष्ट्रिक गर्भनर किरणलाल श्रेष्ठ, रोटरी क्लव अफ रत्ननगरका अध्यक्ष विपिन पोखरेल र मिस नेपाल अर्थ रिया बस्नेतले गोपिचन्द्र लगायतलाई सयुक्त रुपमा पुरस्कार वितरण गरे ।

म्याराथनमा लिगिलिगे दौडमा विजेता बनेर ‘लिगलिगे राजा’ बनेका अनिश थापामगर दोस्रो भए । अनिश पार्की भन्दा ६ सेकेण्डले परे । अनिशले ४२ मिनेट ४१ सेकेण्डले पछि परे । अनिशले २५ हजार नगदसहित चाँदीको तक्मा र प्रमाणपत्र पुरस्कार पाए ।

म्याराथनमा त्रिभुवन आर्मीका दीपक अधिकारी तेस्रो बने । दीपकले निर्धारित दूरी ४४ मिनेट ११ सेकेण्डमा दौड पूरा गरे । दीपकले पनि १५ हजार, चाँदीको तक्मा र प्रमाणपत्र पुरस्कार हात पारे ।

रोटरी क्लब अफ रत्ननगरको आयोजनामा भएको म्याराथनमा पुरुषतर्फ १४९, महिलातर्फ १२१, चेपाङ जातिका ७९ र विदेशी ३ जना गरी ३५२ जनाको सहभागिता थियो । रोटरी क्लब अफ रत्ननगरले भण्डारादेखि रत्ननगरको निपनीसम्म दौड आयोजना गरेको हो ।

सरकारले सुरु गरेको भ्रमण बर्ष २०२० को पर्यटन प्रबद्र्धनको लागि गरिएको मिनी म्याराथन गरिएको हो ।