एक दिवसीय क्रिकेट : नेपालको जितमा कुशलको कीर्तिमानी अर्धशतकीय योगदान

पोखरा । अमेरिकासँगको आइसीसी विश्वकप एक दिवसीय लिग–२ मा नेपालका कुश मल्लले अर्धशतकीय रन बनाएका छन् ।

नेपालले अमेरिकालाई १९१ रनको लक्ष्य प्रस्तुत गर्दा कुशलले अर्धशतकीय ५० रनको योगदान दिए । उनले ५१ बलमा अर्धशतक रन बनाएका हुन् । कुशलले आफूलाई एक दिवसीय क्रिकेटमा अर्धशतीय रन बनाउने कान्छा खेलाडीको रेकर्ड समेत बनाएका छन् ।

घरेलु भुमीमा जारी आइसीसी विश्वकप अन्तर्गत एक दिवसीय लिग–२ क्रिकेटमा कुशलको अर्धशतकीय रनको मद्दतले पाहुना टोली अमेरिकामाथि नेपालले ३५ रनको जित निकाल्यो । कीर्तिपुर मैदानमा टस हारेर ब्याटिङको निम्तो पाएको नेपालले इनिङ समाप्तिको चार बलअघि अलआउट बन्दै १९० रन बनाएको थियो । खराब शुरुवात गरेको नेपालको इनिङमा कुशल मल्लसँगै विनोद भण्डारीले उत्कृष्ट ब्याटिङ गरे ।

पाँच विकेट जाँदा ४९ रनको धरासायी अवस्थामा रहेको नेपालका लागि विनोद र कुशलले ८४ रनको साझेदारी गरे । त्यसअघि, ओपनर सुवास खकुरेलले ३, कप्तान ज्ञानेन्द्र मल्लले २१ र पारस खड्काले १९ रनको योगदान दिएका थिए । दीपेन्द्रसिंह ऐरी डकआउट बन्दा आरिफ शेखले समेत २ रन मात्रै जोडेर आउट बने ।

विनोदले ७९ बलमा ५९ रनको योगदान दिए । उनी रस्टी थेरनको बलमा अक्षय होमराजबाट क्याच आउट बने । सुशन भारीले ११ रनको मात्रै योगदान गरे । बलिङतर्फ क्यामरुन स्टेभेन्सनले ३ विकेट लिए । रस्टी थेरन र सौरभ नेत्राभाल्करले २/२ विकेट लिए ।

जवाफमा १९१ रनको लक्ष्य पछ्याएको अमेरिका ४४. १ ओभरमा १ सय ५५ रनमा अल आउट बनेको थियो । एक सय ५५ रन बनाउने क्रममा अमेरिकाका आइजी हल्याण्डले सर्र्वाधिक ७५ रन बनाए । स्ट्भेन्सनले १९ रन मात्र बनाए ।

बलिङतर्फ करण केसीले सर्वाधिक ४, सुशन भारीले ३, सन्दीप लामिछानेले २ तथा कुशल मल्लले १ विकेट लिए । करण केसी म्यान अफ द म्याच घोषित भए ।

नेपालको जितमा सन्दीप लामिछानेले अमेरिकालाई पहिलो झड्का दिन सफल भए । दोस्रो ओभरमै स्पिन बलिङ लिएर आएका सन्दीपले अमेरिकाले ६ रन बनाउँदा अमेरिकाका आरोन जोन्सलाई एलबीडब्ल्यू धरापमा पारे । जोन्सले ५ रन मात्रै बनाएर आउट बने । अर्को ओभरमा करण केसीले नेपाललाई दोस्रो सफलता दिलाए । करणले स्टेभन टेलरलाई आउट गरे । टेलरले खाता खोल्नै सकेनन् ।

नेपाललाई चौथो सफलता सन्दीपले दिलाए । व्यक्तिगत दोस्रो विकेट हात पार्ने क्रममा सन्दीपले मोनाक पटेललाई एलबीडव्ल्यूको धरापमा पारे । ४ ओभरमा १३ रन बनाएर अमेरिकाले ४ विकेट गुमायो । अमेरिकाले पाँचौं विकेट २७ रनको स्कोरमा गुमाएको थियो । अमेरिकाका अक्षय होमराजलाई सुशन भारीले आउट गरे । होमराज ५ रन बनाएर आउट भएका हुन् ।