सफल पोखरा म्याराथनमा ७३ वर्षीय टंक श्रेष्ठ समेत दौडने

पोखरा । सफल पोखरा म्याराथनमा ७३ वर्षीय टंकबहादुर श्रेष्ठ समेत दौडने भएका छन् ।

फागुनको ३ गते हुने पोखरा म्याराथन अन्तर्गत १० कि.मीं दूरीको म्याराथनमा दौडने श्रेष्ठले बताए । गोरखाको बोर्लाङ स्थायी घर भई हाल पोखरा–७ घारीपाटनमा बसोबास गर्दै आएका श्रेष्ठ गत वर्षको सफल पोखरा म्याराथनमा समेत दौडिएका थिए । गत वर्ष पनि श्रेष्ठले १० कि.मी.को दौड पूरा गरेका थिए ।

उनले भने, ‘देशका लागि केही योगदान गर्र्ने उद्देश्य छ । म्याराथनमा आफ्नो सक्रिय सहभागिता जनाएर खेलकुदप्रति नयाँ पुस्तालाई प्रोत्साहन गर्न चाहन्छु । गत वर्षको अनुभव र उत्साहले यस वर्ष पनि १० कि.मी.को म्याराथन पूरा गर्ने लक्ष्य छ ।’

पोखरा म्याराथनका लागि लक्ष्मी ग्रुपको सुजल डेरीबाट उत्पादित सफल दूधले मुख्य प्रायोजन गर्दै आएको छ । ‘स्वास्थ्यका लागि दौडौं, राष्ट्रका लागि दौडौं’ भन्ने मूल नारासहित प्रत्येक वर्ष हुँदै आएको म्याराथनहरुमा नयाँ विशेषताहरु पनि थपिदैं आएका छन् ।

यस पटकको म्याराथन १४ औं संस्करणको हुनेछ । युनेस्कोका पूर्व अध्यक्ष डेभिड्सन लिङ्कनको समेत यस पटकको म्याराथनमा प्रत्यक्ष सहभागिता रहनेछ । डेभिड्सनले म्याराथनमा आफ्नो सक्रिय एवं प्रत्यक्ष सहभागिता रहने सन्देश समेत पठाएका छन् ।

श्री चीनमोय संस्थाका सदस्य राष्ट्रहरुमध्येबाट १३ देशका करिब १७ जना धावकहरुले आफ्नो देशको झण्डासहित ‘पिस रन टर्च’ बालेर पोखरा म्याराथनमा दौडनेछन् । उनीहरुले विश्वमा शान्तिको सन्देश दिन यस्तो कार्यक्रमहरुमा सहभागिता जनाउँदै आएका छन् ।

गण्डकी प्रदेशका मुख्यमन्त्री पृथ्वीसुब्बा गुरुङ, प्रदेशका आर्थिक मामिला योजनामन्त्री किरण गुरुङ, उद्योग, पर्यटन, वन तथा वातावरणमन्त्री विकास लम्साल र पोखरा महानगरपालिका प्रमुख मानबहादुर जिसी समेत यस पटकको म्याराथन दौडमा सहभागी हुनेछन् ।

क्यान्सर पीडितहरुलाई ‘जीवन संभव छ’ भन्ने सन्देश प्रवाह गर्न क्यान्सरपीडित मञ्जु गुरुङ म्याराथन अन्तर्गत १० कि.मी.को दौडमा यस वर्ष पनि सहभागी हुनेछिन् । नेपालको महिला भलिबल टोलीकी पूर्व कप्तान समेत रहेकी मञ्जुले १३ औं संस्करणको म्याराथनमा पनि सहभागिता जनाएकी थिइन् । मञ्जुसँगै थप २ जना क्यान्सरपीडितहरुले यस संस्करणको म्याराथनमा सहभागिता जनाउँदैछन् ।

पोखरा म्याराथनलाई सफल बनाउन र तयारीका लागि आयोजक संस्था यतिखेर तीब्र प्रचार प्रसारमा लागेको छ । पोखरा महानगरको १ देखि १७ वडा म्याराथन अन्तर्गत ४२.१९५ कि.मी.को म्याराथनको रुट पर्ने भएकोले सम्बन्धित वडाहरुमा प्रचार प्रसारका कार्यक्रमहरु गरिएको छ ।

मञ्चले शुक्रबार पोखराको १३ नं वडामा एक कार्यक्रम ग¥यो । वडाध्यक्षसहित टोलविकास संस्था, सामाजिक संघसंस्था, स्थानीय आमा समूह र क्लबहरुले पोखरा म्याराथनमा सक्रिय सहभागिता जनाउने प्रतिबद्धता जनाएका छन् । उनीहरुले म्याराथन आम पोखरेलीहरुकै भएकाले सफल बनाउन जोड दिए ।

पोखरा–१३ का वडाध्यक्ष लेखबहादुर तामाङले म्याराथनलाई १३ नं वडाको सहयोग रहने जनाए । म्याराथनमा सहभागिताका लागि उक्त दिन वडाभित्रका सामाजिक संघसंस्था, टोलविकास संस्था, स्थानीय आमा समूह र क्लबहरुलाई परिचालन गर्ने तामाङको भनाई थियो ।

‘म्याराथन प्रतियोगिता सिटिलाई चिनाउनका लागि आयोजना गरिन्छ । पोखरामा हुने म्याराथन यस ठाउँलाई चिनाउने उपयुक्त माध्यम पनि हो । भूतपूर्व खेलाडी मञ्चको प्रयासमा यहाँ हुने म्याराथनलार्ई पोखरा महानगरपालिकाले अपनत्व ग्रहण र संरक्षण प्रदान गरेको छ । आगामी वर्षदेखि म्याराथनलाई स्वयं पोखरा महानगरपालिकाले होस्ट गर्नुपर्छ ।’

कार्यक्रममा भद्रकाली माविका प्रअ घनश्याम रिजालले विद्यालयको तर्फबाट म्याराथनमा सहयोग र सहभागिता जनाउने प्रतिबद्धता जनाए । रिजालले म्याराथन अन्तर्गत ५ कि.मी. दूरीको दौडमा आफ्ना विद्यार्थीहरुले सहभागिता जनाउने बताए । म्याराथनको रुट पर्ने विद्यालयको दायाँवायाँ विद्यालयको ब्यानरसहित धावकहरुलाई स्वागत समेत गर्ने प्रतिबद्धता जनाए ।

कार्यक्रममा भूतपूर्व खेलाडी मञ्चका महासचिव खेमबहादुर गुरुङ, मञ्चका संघसंस्था समन्वय समितिका संयोजक तिलक केसी र सह–कोषाध्यक्ष महेश पौडेल लगायतले पोखरा म्याराथनबारे प्रकाश पारेका थिए ।

सफल पोखरा म्याराथन ४२.१९५ किमीको हुनेछ । पोखरा म्याराथनसँगै महिला तथा पुरुषको १० किमीको दौड, विद्यालयका छात्रछात्रा ५ किमी दौड र महिला तथा पुरुषको ह्वीलचियर र दृष्टिबिहीन दौड समेत आयोजना हुनेछन् ।

विश्वमै पोखरालाई म्याराथन शहरको रुपमा चिनाउन र विदेशी धावकहरुलाई आकर्षित गर्न पुरुस्कारको राशीमा समेत वृद्धि गरिएको छ । जसमा यस पटक ४२.१९५ किमिको पोखरा म्याराथन विजेताले २ लाख पुरस्कार पाउने मञ्चले जनाएको छ । त्यसैगरि, दोश्रोले १ लाख, तेश्रोले ७५ हजार, चौथोले १५ हजार पाउनेछन् ।

पोखरा म्याराथन अन्तर्गत १० किलोमिटर महिला तथा पुरुषतर्फ विजेताले १५ हजार, दोस्रोले १० हजार र तेस्रोले ५ हजार पुरस्कार पाउनेछन् । त्यस्तै ५ किलोमिटर छात्रछात्रा दौडमा पहिलोले १० हजार, दोस्रोले ५ हजार र तेस्रोले ४ हजार पुरस्कार पाउनेछन् । महिला तथा पुरुष ह्विलचियर र दृष्टीबिहीन दौडमा पहिलोले ५ हजार, दोस्रोले ३ हजार र तेस्रोले २ हजार पुरस्कार पाउनेछन् ।