खिमनाथले जिते लेखनाथ सहकारी मिनि म्याराथन दौड

पोखरा । खिमनाथ शर्माले लेखनाथ वचत तथा ऋण सहकारी संस्था आयोजना गरेको पुरुषतर्फको म्याराथन दौड जितेका छन् ।

सहकारी संस्थाको १२ औं स्थापना दिवस तथा ११ औं वार्षिकोत्सवको अवसरमा मिनी म्याराथन दौड प्रतियोगिताको आयोजना गरिएको हो ।

सहभागी सेयर सदस्यहरुको दौडमा ५६ जनालाई पछि पार्दै खिमनाथले पुरुषतर्फको म्याराथन दौड जितेका हुन् । उनले १७ मिनेट ३४ सेकेण्डमा ४ कि.मी.को निर्धारित दूरीलाई पार गर्दै म्याराथनको दौड जितेका हुन् ।

त्यस्तै, उक्त स्पर्धामा पुरुषतर्फ सूर्यराज बस्ताकोटी दोस्रो, षडानन्द शर्मा तेस्रो र बिष्णु शर्मा चौथो बने ।

महिलातर्फ पवित्रा लामिछानेले म्याराथन दौड जितिन् । उक्त स्पर्धामा अञ्जु खड्का दोस्रो, नारायणी अधिकारी तेस्रो र शोभा भुजेल शान्त्वना स्थानमा आए ।

पहिलो बनेका खिमनाथ र पवित्राले ५/५ हजार पुरस्कार जिते । दोस्रो बनेका सूर्यराज र अञ्जुले समान ३/३ हजार पुरस्कार जिते ।

तेस्रो बनेका षडानन्द र नारायणीले २/२ हजार पुरस्कार जिते । त्यस्तै, शान्त्वना स्थान हासिल गरेका बिष्णु र शोभाले समान १/१ हजार पुरस्कार पाए ।

सहकारीका सेयर सदस्यबीच मित्रता र भाईचाराको सम्वन्ध विस्तार गर्न ’स्वास्थ्यका लागि दौड’भन्ने मूल नाराका सहित आयोजना गरिएको म्याराथन दौड पूरा गर्ने सेयर सदस्यहरुलाई जनही ५/५ सय प्रदान गरिएको थियो ।