मच्छिन्द्र ए डिभिजन लिगको शीर्ष स्थानमा

पोखरा । मच्छिन्द्र फुटबल क्लब सहिद स्मारक ए डिभिजन लिगको शीर्षस्थानमा उक्लिएको छ । एन्फा कम्प्लेक्स मैदानमा संकटा क्लबलाई ३ –१ ले हराउँदै मच्छिन्द्र जारी लिगको शीर्ष स्थानमा उक्लिएको हो ।

संकटामाथिको जितसँगै मच्छिन्द्रको  १२ खेलबाट २८ अंक बटुल्दै शीर्ष स्थानमा छ । दोस्रो स्थानमा रहे को आर्मीले १ खेल कम खेल्दै २६ अंकको अवस्थामा छ ।

मच्छिन्द्रका लागि देवेन्द्र तामाङ, विशाल राई ‘बी’ र दीपक राईले १/१ गोल गरे । । खेलको ९० औं मिनेटमा संकटाका मसोउकीले टोलीका लागि शान्त्वना गोल गरे ।

संकटाविरुद्ध सानदार प्रदर्शन गरेको मच्छिन्द्रले ४४ औं मिनेटमा देवेन्द्रको गोलबाट सुरुआती अग्रता लिएको थियो । उनले रन्जित धिमालको कर्नर पासमा हेड मार्फत गोल गरेका थिए । त्यसपछि ६४ औं मिनेटमा बिशाल राईले लामो फ्री–किकमा गोल गर्दै टोलीको अग्रता दोब्बर बनाए । त्यसपछि ८२ औं मिनेटमा दिपक राईले रन्जित धिमालको पासमा गोल गर्दै मच्छिन्द्रको जित सहज बनाए ।

सरस्वति ‘बी’ डिभिजनमा घटुवा

यता सरस्वती युवा क्लब भने जारी लिगबाट ‘बी’ डिभिजनमा घटुवा भएको छ । च्यासल युथ क्लबसँग पराजित भएसँगै सरस्वति सहिद स्मारक ‘ए’ डिभिजन लिग फुटलबबाट ‘बी’ डिभिजनमा घटुवा भएको छ ।

हल्चोकस्थित सशस्त्र प्रहरी बल एपिएफको खेल मैदानमा सोमबार भएको १२ औँ चरणको खेलमा सरस्वती च्यासल युथ क्लबसँग २–१ गोल अन्तरले पराजित हुँदै बी डिभिजन लिगमा घटुवा भएको हो । सरस्वती लिगको एक खेल खेल्न बाँकी छँदै ‘बी’ डिभिजनमा घटुवा भएको हो ।

सरस्वतीबाहेक अन्य टोली अब घटुवामा पर्ने छैनन् । अखिल नेपाल फुटबल संघ एन्फाले यस पटक १४ टोलीमा एक टोली मात्र घटुवा हुने प्रावधान बनाएको थियो । क्लबको इतिहासमा सरस्वती दोस्रो पटक घटुवा भएको हो । यसअघि विसं २०६३ मा पहिलो पटक ए डिभिजन लिग खेलेको सरस्वती सोही वर्ष ‘बी’ डिभिजनमा घटुवा भएको थियो । त्यसयता ए डिभिजनमा रहेर खेलिरहेको थियो ।

च्यासलको जितमा जापानी खेलाडीद्वय ताइगा नाकामुरा र हायातो वाकिनोले १/१ गोल गरे । सरस्वतीका लागि भने काजिम बुसारीले १ गोल फर्काए । खेलको ‘म्यान अफ दी म्याच’ च्यासलका नाकामुरा भए । सरस्वतीलाई पराजित गरेसँगै च्यासल भने १५ अंक सहित लिगको नवौँ स्थानमा छ ।