गौतम बुद्ध अन्तर्राष्ट्रिय क्रिकेट रंगशालालाई कलश सहकारीको सहयोग

पोखरा । धुर्मुस सुन्तली फाउण्डेसनले चितवनको भरतपुरमा बनाउदै गरेको गौतम बुद्ध अन्तर्राष्ट्रिय क्रिकेट रंगशाला निर्माण सहयोगका लागि पोखराको कलश बचत तथा ऋण सहकारी संस्थाले ७५ हजार प्रदान गरेको हो ।

निर्माणधीन रंगशालामा पुगेको सहकारीको टोलीले उक्त रकम प्रदान गरेको हो । सहकारीका अध्यक्ष दुर्गाप्रसाद सुबेदीले रंगशाला निर्माणका सदस्य कुमार कट्टेललाई सो रकम हस्तान्तरण गरेका हुन् ।

कार्यक्रममा बोल्दै अध्यक्ष सुवेदीले सहकारीको सामाजिक उत्तरदायित्व कार्यक्रम अन्तर्गत रकम प्रदान गरिएको बताए । उनले कलाकार सीताराम कट्टेल धुर्मुस तथा कुञ्जना घिमिरे सुन्तलीले थालेको विकासको अभियानमा सहभागी हुन पाएकोमा खुसी व्यक्त गरे ।

कलाकार कुमार कट्टेलले देश भित्र बनिरहेको रंगशाला नेपालीकै रंगशाला भएको बताए । उनले हरेक जिल्लाबाट स्वतः स्फुर्त सहयोग जुटिरहेकोमा उत्साहित भएको बताए । सहयोग गरे वापत फाउण्डेशनले सहकारीलाई सम्मानपत्रद्धारा सम्मान गरेको थियो ।

कलाकार सीताराम कट्टेल तथा कुञ्जना घिमिरेको अगुवाईमा धुर्मुस फाउण्डेसनले निर्माण गरिरहेको रंगशाला २० बिघा ६ कट्ठा क्षेत्रफलमा निर्माण हुँदैछ । नेपालमै पहिलो पटक बन्न लागेको २५ हजार दर्शक क्षमताको रंगशालामा ४ प्रवेशद्वार रहनेछन् । मुख्य प्रवेशद्वार नेपालको झल्को दिने रहनेछ ।

निर्माणका लागि अगाडी सारिएको रंगशाला क्रिकेटका अलावा अन्य खेलकुद आयोजना गर्न योग्य रहने फाउन्डेसनले बताएको छ । रंगशालासँगै २ छुट्टै अभ्यास मैदानसमेत हुनेछन् । यस्तै, क्रिकेट एकेडमीसहितको बन्न लागेको रंगशाला परिसरमा फुटबल, स्विमिङ, बास्केटबल, भलिबल, डन्डीबियो, लन टेनिस लगायतका खेलमैदान रहनेछन् ।