नेपालको ७१ जिल्लामा फैलियो कोरोना संक्रमण, अब कोरोनासम्बन्धी मिडिया ब्रिफिङका लागि डा. जागेश्वर गौतम

पोखरा । नेपालको ७१ जिल्लामा कोरोना (कोभिड–१९) को संक्रमण फैलिएको स्वास्थ्य तथा जनसंख्या मन्त्रालयको रिपोर्टमा उल्लेख छ ।

मन्त्रालयको रिपोर्टअनुसार ७७ जिल्लामा आइतबारसम्म ७१ जिल्लाका नेपाली कोरोनाको संक्रमणमा परिसकेका छन् ।

विश्वव्यपापीरूपमा फैलिएको कोरोना महामारीका कारण नेपालमा कोरोना संक्रमितको संख्या २ सय १३ जना थपिएको छ । कोरोना संक्रमित कुल संख्या ३ हजार ४ सय ४८ पुगिसकेको छ ।

नेपालमा कोरोना संक्रमितको संख्यामध्ये ३ हजार २ सय १२ जना छन् । संक्रमितमध्ये २ सय ३६ जना महिला छन् । आइतबार थपिएका २ सय १३ जनामा २ सय ९ जना पुरुष र ४ जना महिला छन् ।

आइतबारसम्म क्वारेन्टाइनमा १ लाख ७० हजार ७ सय ३२ जना रहेको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले जानकारी गराए । डा. देवकोटाले आइसोलेसन र विभिन्न अस्पतालमा गरी २ हजार ९ सय ६८ जनाको उपचार भइरहेको पनि जानकारी गराए । संक्रमितमध्ये कोरोनालाई जितेर आइतबार १ सय २ जना डिस्चार्ज भएका छन् । जसमा १ सय पुरुष र २ महिला छन् ।

हालसम्म १ लाख ४५ हजार ४९ जनाको आरडीटी विधिबाट परीक्षण गरिएको प्रवक्ता डा. देवकोटाले जानकारी गराए । आम नागरिक र बिज्ञहरूको तर्फबाट सरकारको कामप्रति प्रश्न उठाएपछि नेपाल सरकार तथा स्वास्थ्य मन्त्रालयले मन्त्रालयका प्रतिनिधि, नेपाल मेडिकल काउन्सिलका प्रतिनिधि, नेपाल चिकित्सक संघका प्रतिनिधि र निजी अस्पतालका तर्फबाट समेत प्रतिनिधि रहने गरी आइतबार समिति गठन गरेको मन्त्रालयका प्रवक्ता डा. देवकोटाले जानकारी गराए ।

डा. देवकोटाले ७६ दिन लगातार कोरोना संक्रमणबारे अनवरत् रूपमा सूचना दिँदै आएका थिए । लामो समय संचारमाध्यममा छाएका डा. देवकोटाको जिम्मेवारी परिवर्तन भएको जानकारी गराउँदै सोमबारदेखि मिडिया व्रिफिङका साथै प्रवक्ताको जिम्मेवारी प्रसूति गृहका पूर्वनिर्देशक डा. जागेश्वर गौतमले सम्हालेको डा. देवकोटाले जानकारी गराए ।