मालेपाटनमा आठौं खुला तीज गीत प्रतियोगिता गरिने

भदौको दोस्रो हप्तादेखि मालेपाटन आडौं खुला तीज गीत प्रतियोगिता तथा महिला खेलकुद प्रतियोगिता हुने भएको छ।

पोखरा महानगरपालिका वडा नं. ५ मा रहेको सूर्यचन्द्र विकास समाजले भदौ १२ देखि १४ गतेसम्म आठौं सस्करणको खुला तीज गीत तथा महिला खेलकुद प्रतियोगिता गर्ने भएको हो।

कोभिडका कारण २ वर्ष स्थगित रहेको प्रतियोगिता यस वर्ष संचालन गरिने सूर्यचन्द्र विकास समाजले जनाएको छ।

तीज गीत प्रतियोगितासँगै महिलाहरुको छेलो प्रतियोगिता र दौड प्रतियोगितासमेत राखिने अयोजकले बताएको छ।

तीज गीत प्रतियोगितामा प्रथम हुने टिमले नगद २० हजार, दोश्रोले १५ हजार, तेश्रोले १० हजार र सान्त्वनाले ५ हजार रुपैयाँ प्राप्त गर्ने छन्।
साथै उत्कृष्ट भेषभूषा, उत्कृष्ट नृत्य र दर्शक उत्कृष्ट नृत्यमा पनि पुरस्कार राखिएको आयोजकले जनाएको छ। प्रतियोगितामा ५ लाख ३८ हजार खर्च हुने बताइएको छ। प्रतियोगिता मालेपाटन खेल मैदानमा हुनेछ।

प्रतियोगितालाई भव्य रुपमा सम्पन्न गर्न विभिन्न उपसमिति समेत गठन गरिएको छ।