नवौं राष्ट्रिय खेलकुद: महिला क्रिकेटमा बागमतीको सहज जित

नवौं राष्ट्रिय खेलकद प्रतियोगिताअन्तर्गतको महिला क्रिकेट प्रतियोगितामा बागमती प्रदेशले विजयी सुरुआत गरेको छ।

पोखरा रंगशाला स्थित क्रिकेट मैदानमा आज (आइतबार) भएको खेलमा बागमतीले सूदूरपश्चिम प्रदेशमाथि ८ विकेटले सहज जित हात पारेको हो।

सूदूरपश्चिम प्रदेशले दिएको ७२ रनको लक्ष्य बागमतीले १३ ओभर १ बलमा २ विकेट गुमाएर पूरा गर्न सफल बन्यो।

बागमतीको जितमा कन्चन श्रेष्ठले २५ तथा सुमन खतिवडाले अविजित ११ रन बनाए। अस्मिता खरेलले ९ रन बनाइन्। आरती बिडारी ३ रनमा अविजित रहिन्। सूदूरपश्चिमका लागि यसु पाण्डेले १ विकेट लिइन्।

त्यसअघि, पहिले ब्याटिङ गरेको सूदूरपश्चिम १८ ओभर २ बलमा ६१ रनमा अलआउट बन्यो। सूदूरपश्चिमका लागि अनु कडायत र रुबी पोदारले दोहोरो अंक जोड्न सफल भए। अनुले २२ तथा रुबीले १२ रन बनाए। बागमतीका लागि सोनी पाख्रिनले ५ विकेट लिइन्। खुसी डंगोलले २ विकेट लिइन्।

महिला क्रिकेटमा ९ टोलीको सहभागिता छ। सहभागी टोलीलाई २ समूहमा विभाजन गरिएको छ। समूहको शीर्ष २ टोलीले सेमिफाइनलमा स्थान बनाउनेछन्।

समूह ’ए’ मा एपीएफ क्लब, मधेश प्रदेश, गण्डकी प्रदेश, सुदुरपश्चिम प्रदेश र बागमती प्रदेश रहेका छन्।

समूह ’बी’ मा नेपाल पुलिस क्लब, कर्णाली प्रदेश, प्रदेश–१ र लुम्बिनी प्रदेश रहेका छन्।

महिला क्रिकेट असोज १ कार्तिकसम्म चल्नेछ। नवौं राष्ट्रिय खेलकुद असोज २८ देखि कार्तिक ३ सम्म आयोजना चल्ने । तर, पुरुष क्रिकेट भने अगाडी नै आयोजना भइसकेको छ। पुरुष क्रिकेटमा विभागीय नेपाल पुलिसले स्वर्ण, विभागीय आर्मीले रजत र सूदूरपश्चिमले कास्य पदक जितिसकेको छ।