पत्रकार ‘सल्यानी’लाई युआरएल पत्रकारिता पुरस्कार

यस वर्षको युआरएल पत्रकारिता पुरस्कार २०७९ पत्रकार आरजू विष्ट ‘सल्यानी’लाई प्रदान गरिने भएको छ।

गण्डकी प्रदेशकै पहिलो रेफरेन्स ल्याब युनाइटेड रेफरेन्स ल्याबोरेटरी (युआरएल)ले स्थापना र संचालन गरेको यो पुरस्कारराशी नगद २० हजार र ताम्रपत्र छ।

नेपाल पत्रकार महासंघका केन्द्रीय सदस्य त्रिभुवन पौडेल संयोजक र डा सुरेश पौडेल र पत्रकार वासुदेव मिश्र सदस्य रहेको प्रतिभा छनोट समितिले ‘सल्यानी’लाई पुरस्कृत गर्ने निर्णय गरेको हो।

पोखरामा रहेर २ दशकभन्दा बढी पत्रकारितामा क्रियाशील ‘सल्यानी’ रेडियो अन्नपूर्ण र सफल आवाज डटकममा कार्यरत् छन्। गीतकार/गजलकारको रुपमा समेत चर्चित उनी फाइन आर्टका कलाकार समेत हुन्।

मंसीर २३ गते युआरएलको वार्षिकोत्सव समारोहमा ‘सल्यानी’लाई पुरस्कार अर्पण गरिने युआरएलका अध्यक्ष ठाकुरप्रसाद पन्तले जानकारी दिएका छन्।

नि:शुल्क १ सय ३० शिविर संचालन गरिसकेको युआरएलले जनतालाई स्वास्थ्यबारे सचेत बनाउने पत्रकारलाई पुरस्कृत गरी वार्षिकोत्सव मनाउँदै आएको उनले बताए। यसअघि यो पुरस्कारबाट पत्रकारहरु ऋषि खतिवडा, यदुनाथ वञ्जारा, सुरेन्द्र पौडेल, प्रदीप पौडेल र हरि बास्तोला सम्मानित भइसकेका छन्।