महिला टी–२० विश्वकपको एशिया छनोट: नेपाल हङकङसँग पराजित

आइसीसी महिला टी–२० विश्वकपको एशिया छनोट खेलमा नेपाल हङकङसँग पराजित भएको छ।

नेपाल हङकङसँग ७ विकेटले पराजित भएको हो।

थाइल्यान्डको एआईटी ग्राउन्टमा नेपालले दिएको ३० रनको लक्ष्य हङकङले ४ ओभर ३ बलमा ३ विकेट गुमाएर भेट्टायो।

हङकङकी शनजीन शाहजादले नटआउट १५ रन बनाइन्।

नेपालकी कविता कुँवरले २ विकेट लिइन्।

यसअघि, टस हारेर ब्याटिङको निम्तो पाएको नेपालले निर्धारित ५ ओभरमा ३ विकेट गुमाएर २९ रन बनायो।

दिउँसो सवा १२ बजे सुरू हुनुपर्ने खेल वर्षाका कारण प्रभावित भएपछि ५ ओभरमा झारिएको हो।

नेपालकी सम्झनाकुमारी खड्काले सबैभन्दा धेरै १० रन बनाइन्।

हङकङकी मे वे सुले ३ विकेट लिइन्।

यसअघि, नेपाल र हङकङबीचको पहिलो खेल वर्षाका कारण रद्द भएको थियो।

दोस्रो खेलमा नेपालले बहराइनलाई ९ विकेटले हराएको थियो।

यस्तै, नेपालले पर्सि (बिहीवार) फेरि बहराइनसँग खेल्नेछ।

महिला टी–२० विश्वकप एशिया छनोटमा ९ देश सहभागी छन्।

नेपाल, बहराइन र हङकङ समूह ‘सी’ मा छन्।

यस्तै समूह ‘ए’ मा भुटान, कुवेत र आयोजक थाइल्यान्ड छन्।

समूह ‘बी’ मा मलेशिया, कतार र युएई छन्।

प्रतियोगितामा हरेक समूहका शीर्ष टोली ‘सुपर थ्री’ मा पुग्नेछन्।

‘सुपर थ्री’ मा शीर्ष २ मा रहने टोली ग्लोबल छनोट चरणमा पुग्नेछन्।