२१ औं संस्करणको लेखनाथ महोत्सवको तयारी पूरा

२१ औ संस्करणको लेखनाथ महोत्सवको तयारी अन्तिम चरणमा पुगेको छ।

लेखनाथ उद्योग वाणिज्य संघले यहि पुष ३ गते देखि १४ गते सम्म आयोजना गरेको ‘महोत्सव लेखनाथको संस्कृति, स्थानीय उत्पादन विकास र सम्मृद्धि’ भन्ने नाराको साथ आयोजना गर्न लागिएको महोत्सवको तयारी पुरा भएको मंगलबार आयोजित पत्रकार सम्मेलनमा आयोजकले जानकारी दिएको हो।

संघकी अध्यक्ष एवं महोत्सव मूल संयोजक जानुका पराजुली अधिकारीले महोत्सवको तयारी पूरा भएको जनाइन्।

उनले स्थानीय तथा राष्ट्रिय अर्थतन्त्रलाई चलायमान बनाउने उद्देश्यले महोत्सव आयोजना गरिएको वताइन्।

महोत्सवलाई क्रेता, विक्रेता र उपभोक्ताबीचको साझा थलोका रूपमा विकास गर्ने अपेक्षा गरिएको पराजुलीले जनाइन्।

लेखनाथ महोत्सवलाई ‘अनौपचारिक विश्वविद्यालय’ का रूपमा स्थापित गर्ने लक्ष्य रहेको पराजुलीले उल्लेख गरिन।

विहिबारदेखि सुरु हुने महोत्सवको विशेष आकर्षणका रूपमा जलपरी प्रदर्शन, कृषि, पर्यटन र उद्योग विषयक टक–शो, टिकटक प्रतियोगिता, आर्ट एन्ड क्रिएटर प्रतियोगिता, शान्तिका दूत गौतम बुद्धको प्रतिमा, घरेलु तथा ग्रामीण प्रविधि प्रदर्शनी, महिला विशेष रत्यौली गीत कार्यक्रम, विद्यालयस्तरीय नृत्य, शैक्षिक प्रदर्शनी, साहित्यिक कार्यक्रम, विभिन्न जातजातिका मौलिक संस्कृति झल्कने झाँकी र्‍याली एवं साँस्कृतिक प्रस्तुति, ख्यातिप्राप्त हास्य कलाकारहरूको दैनिक प्रस्तुति, राष्ट्रिय लोकदोहोरी तथा युवालक्षित पप र सुगम संगीत कन्सर्ट समावेश गरिएको छ।

त्यसबाहेक महोत्सवमा औद्योगिक तथा व्यापार, हस्तकला, कृषि तथा दुग्धजन्य उत्पादन, सुन्तला, माछा, मौरी, कफी, विउ-विजन, तरकारी, जैविक विविधता, फूड फेस्टिभल, अटोमोबाइल प्रदर्शनी हुनेछ।

महोत्सवमार्फत पर्यटन प्रवर्द्धन सामग्री तथा वित्तीय सेवासम्बन्धी समेत जानकारी प्राप्त गर्न सकिनेछ।

महोत्सवमा उधोग, व्यापार, व्यवसाय, सेवामुलक एवं सूचनामुलकसहितका ३ सय ३५ वटा स्टलहरु रहनेछन्।

महोत्सव अवलोकन गर्न करिब २ लाख ५० हजार दर्शक आउने आयोजकको अपेक्षा छ।

करिब ९ करोड रुपैयाँ बराबरको आर्थिक कारोबार हुने अपेक्षा गरिएको महोत्सवका प्रचार–प्रसार संयोजक धुर्वबाबु भट्टराईले बताए।

महोत्सवबाट करिब ९५ लाख रुपैयाँ आम्दानी हुने र ८५ लाख रुपैयाँ खर्च भई १० लाख रुपैयाँ बचत हुने भट्टराईले जानकारी दिए।

लेखनाथ उद्योग वाणिज्य संघ र नेपाल उद्योग वाणिज्य महासंघको संयुक्त आयोजनामा हुने महोत्सवमा उद्योग तथा पर्यटन मन्त्रालय गण्डकी प्रदेश र नेपाल उद्योग वाणिज्य महासंघ गण्डकी प्रदेशको सह–आयोजना, पोखरा महानगरपालिका र नेपाल पर्यटन बोर्डको प्रवर्द्धन तथा विभिन्न संघसंस्थाको सहयोग रहने आयोजकले जनाएको छ।

महोत्सवको टिकट दर विद्यार्थीका लागि ५०, साधारण प्रवेश १०० र कन्सर्ट टिकट २०० तोकिएको छ।

जेष्ठ नागरिक, अपाङ्गता भएका व्यक्ति र एकल महिलालाई सामाजिक सुरक्षा भत्ता परिचयपत्रका आधारमा नि:शुल्क प्रवेशको व्यवस्था गरिएको आयोजकले जनाएको छ।

गृहलक्ष्मी ग्याँस कम्पनी प्रा.लि.को मुख्य प्रायोजनमा हुने उक्त महोत्सवको सह–प्रायोजकमा बिएलसी गु्रप (नर्भिक हस्पिटल), पशुपति विस्कुट, हेटौडा डेरी रहेका छन्।