कास्कीको याङ्जाकोटमा फोटो पत्रकारको साधारणसभा

नेपाल फोटो पत्रकार संघ कास्कीको साधारणसभा मंगलबार भएको छ।

कास्कीको मादी गाउँपालिका–३ याङ्जाकोटमा साधारणसभा भएको हो।

साधारणसभाबाट संघले गरेको प्रमुख उपलब्धि र सिकाईहरुको विश्लेषण गर्दै आगामी वर्षका कार्यक्रम, संस्थागत संरचना र रणनीतिक योजनाहरु औपचारिक रुपमा पारित गरिएको छ।

साथै, सचिव धनबहादुर गुरुङको प्रगति प्रतिवेदन र कोषाध्यक्ष युनिश गुरुङको आर्थिक प्रतिवेदन पनि सर्वसम्मतले पारित गरेको छ।

साधारणसभाले संस्थापक अध्यक्ष, घनश्याम पौडेलको संयोजकत्वमा फोटो पत्रकार अक्षयकोष संचालन कार्यविधि निर्माण समिति बनाएको छ।
उक्त समितिको सदस्यमा पूर्वअध्यक्ष कृष्णमणि बराल र निवर्तमान अध्यक्ष दुर्गाप्रसाद पौडेल छन्।

नेपाल पत्रकार महासंघ, गण्डकी प्रदेशका अध्यक्ष रमेश पौडेलले साधारणसभाको उद्घाटन गरेका थिए।

कार्यक्रममा उनले दिगो र व्यावसायिक फोटो पत्रकारिता अहिलेको आवश्यकता रहेको औंल्याए।

सूचना प्रविधिको युगमा स्तरीय फोटो खिच्न चूनौति रहेको उनको भनाई थियो।

सोही कारण समाचारको अभिन्न अंग फोटो व्यावसायिक बनाउँदै लैजानुपर्नेमा उनले जोड दिए।

नेपाल फोटो पत्रकार संघ, कास्कीका अध्यक्ष राम गुरुङले आगामी दिनमा आगामी दिनमा मल्टिमिडिया तालिम गर्ने, फोटो प्रदर्शनीलाई निरन्तरता दिने, फोटो यात्रालाई निरन्तरता दिने, अक्षयकोषलाई वृद्धि गर्दै जाने, फोटो पत्रकारितामा योगदान दिने फोटो पत्रकारलाई सम्मान गर्नेलगायतको कार्यक्रम गर्ने योजना सुनाए।

नेपाल फोटो पत्रकार संघ, कास्कीकी उपाध्यक्ष राधिका कंडेलले आगामी दिनमा संस्थालाई अझै क्रियाशिल बनाउँदै लैजाने बताइन्।